Fillo të kalërosh – Program për Fillestarë

Ky program ngrihet mbi historinë tonë të lidhjes me kuajt dhe mbi parime themelore si respekti, vëzhgimi dhe harmonia me natyrën. Kuajt nuk janë thjesht kafshë transporti apo pune ,ata janë partnerë të shkëlqyer në natyrë, krijesa të ndjeshme që pasqyrojnë qartë personalitetin e tyre dhe atë të njeriut që i afrohet.

Në themel qëndron njohja e kalit si qenie anatomike, me sjellje, interesa dhe një botëkuptim të formuar në jetën e tufës. Kuajt shprehin qartë emocionet e tyre: frikën, gëzimin, zemërimin, krenarinë, fajin dhe shumë të tjera. Ata janë mësues të jashtëzakonshëm për vendosjen e kufijve personalë, aftësitë e lidershipit, menaxhimin e inatit dhe frikës, mendimin aktiv dhe shijimin e momentit.

Pjesa fillestare e mësimeve fokusohet tek kontakti shpirtëror dhe fizik me kalin, duke kaluar shumë kohë nga toka , rreth 50% e mësimeve të para , për të vendosur një bazë të fortë besimi. Njohja e kuajve nga toka është hapi i parë, sepse gjithçka që mësohet atje mund të zhvendoset më pas në shalë. Kuajt janë krijesa përsëritëse, me kujtesë shumë të fortë dhe ata mësojnë më së miri nga përsëritja e saktë e veprimeve dhe disiplinës së kalorësit.

Përvoja jonë ka treguar se kur njeriu heq dorë nga egoja apo nevoja për të dominuar, lidhja me kalin rrjedh natyrshëm dhe krijohen histori të jashtëzakonshme miqësie. Në këtë program, pjesëmarrësit mësojnë se si të ecin krah kalit si partner, të ndërtojnë kontroll dhe siguri, dhe të përjetojnë një marrëdhënie të re me natyrën dhe vetveten.

Caravan ka mbi 15 vite përvojë dhe organizon çdo vit udhëtime të gjata për mbi 400 kalorës ndërkombëtarë. Përveç eksperiencës ndërkombëtare dhe shkëmbimeve me trajnerë të huaj, ne kemi vendosur të krijojmë një program për tregun shqiptar, me qëllimin e qartë për të ringritur kulturën e kalërimit në vend.

Ky program është i menduar për fillestarët absolutë, për njerëz që nuk kanë pasur asnjë kontakt me kuajt, për ata që kanë frikë ose drojë, për individët që ndihen të pasigurt fizikisht apo emocionalisht, si dhe për ata që janë të hapur dhe duan të përjetojnë një përvojë të re.

Ky nuk është një program gare sfida është vetëm me veten. Ai synon të ndihmojë pjesëmarrësit të ndërtojnë besim, të shtyjnë rritjen personale dhe të përmirësojnë cilësinë e jetës përmes lidhjes me kuajt dhe natyrën.

• Përvoja ndërkombëtare dhe shkëmbimet me trajnerë të huaj na japin bazën profesionale.
• Përdorim elemente të programit Parelli Natural Horsemanship, e njohur për zhvillimin e marrëdhënies së besimit dhe respektit mes kalit dhe kalorësit.
• Programi ndërthur praktikat vendase tradicionale me teknikat moderne, duke ofruar një përvojë gjithëpërfshirëse dhe unike.

Pas përfundimit të 36 mësimeve, pjesëmarrësit janë të aftë të dalin në natyrë me kontroll të mirë, duke shijuar ecjen, trokun dhe canterin e lehtë, dhe duke ndërtuar një udhëtim personal të rritjes dhe harmonisë me natyrën dhe kalin.