– Pagesë e detyrueshme mujore 2000 lekë për kontroll shëndetsor dhe shërbim veterinar.
– Çdo kontribut tjetër sipas dëshirës.
– Ju përfitoni deri në 3 seanca instruktimi falas çdo muaj. Per cdo seance shtese ka nje kosto prej 1000 lekesh deri me 31 Maj 2021.
– Nëse keni dëshirë ju mund të ofroheni për punë vullnëtare pranë qendrës 1 herë në javë.
– Ju përfitoni çertifikatën e adoptimit nëse patronazhi juaj përmbyll të paktën një vit.
– Ju pranoheni si anëtar i klubit të kalërimit pas 1 viti eksperience si adoptues.
Pak informacion / Rraca e kalit shqiptar
E njohur ndërkombëtarisht në katalogun ndërkombëtar të kuajve si “Albanian horse” kali shqiptar është mes bartësve të fundit të karakteristikave të tarpanit të Ballkanit. Në mesjetë tarpanët primitivë, kuaj me trup të vogël, intutitë të shkëlqyer dhe aftësi për tu kamufluar në natyrë u kryqëzuan me arabët e sjellë prej otomanëve. Shumë arabë të pastër nuk i mbijtuan dot habitatit dhe kushteve të reja po kali i prodhuar prej kryqëzimit shpejt u bë bartës i karakteristikave të të dy rracave dhe fitoi aftësi shumë të mira përshtatjeje. Kali i ri ishte pak më i lartë, më energjik dhe më i shpejtë se tarpani si dhe një ngjitës i shkëlqyer terrenesh të ashpra. Kali shqiptar që u konfirmua si rracë e veçantë gati 100 vite më parë ruajti mendjen e kthjellët të tarpanit, këmbët e tij të sigurta, fortësinë e thundrave dhe shumë karakteristika të kalit arab. Rraca pësoi dëmtime serioze gjatë dekadave të fundit duke u përfaqësuar tani nga jo më shumë se 1000 individë. Sfidë e Caravan mbetet mbrojtja e tij por edhe përmirësimi i cilësisë së individëve të rinj që vijnë nga kryqëzimi. Ne sigurisht synojmë ruajtjen e karakteristikave të kalit shqiptar por njëkohësisht na nevojiten individë me përmasa më të mëdha për kalorës që i afrohen limitit tonë të peshës prej 90kg.
“Adopto një kalë” është një program që ne e ndërtuam për të ndarë me ju pasionin për kuajt, dhe një mundësi e shtuar për tu përkujdesur për kuajt tanë. Kali është një qenie e ndjeshme. Megjithëse si mentalitet merr kohë që të miqësohet me njeriun kur kjo ndodh lidhjet janë shumë të forta. Ne dëshirojmë të krijojmë një komunitet që vendos lidhje afatgjata me kuajt, themelet e një klubi kalërimi ku anëtarët ndajnë mes tyre të njëjtin pasion. Nuk është një sipërmarrje që do t’ju bëjë kalorës në një javë as në një muaj e as në një vit por angazhimi do t’ju ofrojë një mundësi të natyrshme dhe graduale për tu shoqërizuar me një kalë, për të ndërtuar marrëdhënie e për të rritur gradualisht nivelin tuaj fillimisht në pistë e më pas në terren.
“Adopto një kalë” është një sfidë për ju dhe për ne, sfidë rezistence dhe pasioni. Kalërimi është një disiplinë strikte që kërkon durim, përqëndrim, vëmendje, njohje dhe reflektim të thellë.
Ne kemi 44 kuaj dhe mëza. Ata janë shumë të ndryshëm nga njëri tjetri. Disa janë kuriozë, disa intuitivë, disa harraqë, disa të zgjuar, disa jo shumë të zgjuar, disave ju pëlqen humori, disa i pëlqejnë njerëzit, disa janë rebelë dhe të vështirë të ndërtojnë raporte. Kemi kuaj që duan përkujdesje dhe vëmendje dhe individë vetmitarë dhe individualistë. Pelat janë shumë të ndryshme nga kuaj. Ato janë karaktere të pavarura dhe shpesh shfaqin pakënaqësi. Merr shumë kohë miqësia me to por kur vendoset askush nuk do t’ju shohë me më shumë dashuri. Mëzat mund të vendosin me njerëzit marrëdhënie të gjata dhe unike. Adoptuesi gjithnjë i ofron një kali ende të patrajnuar diçka nga vetja, i kultivon besimin dhe përcakton një aspekt të sjelljes. Cilido qoftë kali që do të adoptoni ju do të mësoni shumë prej tij. Si kalorës e themi me bindje se shumë gjëra që dijmë për jetën i kemi mësuar nga kuajt.
Ju duhet të shfaqni interesin për programin duke na kontaktuar. Ne do të gjejmë një kalë të përshtatshëm për ju pasi të vlerësojmë se çfarë prisni nga kjo marrëdhënie.
